کلام :منیر احمد

نعت

روضہِ اطہر پہ کی تھیں جو کبھی سرگوشیاں
یاد آتی ہیں مجھے وہ باہمی سرگوشیاں

مژدہِ جنت ملا تھا فاطمہ کو آپﷺ سے
مصطفیٰ نے اُن سے کیں جب آخری سرگوشیاں

جلوہِ رُوئے نبی کے شوق میں کرتا رہا
آہ و زاری، اشک باری، نت نئی سرگوشیاں

کیسے رکھتا رو بروئے مصطفیٰ حرفِ نیاز؟
کر رہا ہوں اس لئے میں سہمی سی سرگوشیاں

میں پکاروں دل ہی دل میں یا کروں آہ و فغاں
جانتے ہیں، وہ کہی اور اَن کہی سرگوشیاں

حسرتِ دیدار لے کے بیٹھے ہیں سب دم بخُود
کر رہی ہے روضے پر خود رفتگی سرگوشیاں

ان کے روضے پر ہیں سب، شاہ و گدا، کاسہ بہ کف
منتظر خیرات کی ہیں میری بھی سرگوشیاں

ہم پہ ہیں جو نزہتیں یہ مصطفائی فیض ہے
“پھول بھی بھونروں سے کرتے ہیں یہی سرگوشیاں”

یاد آتی ہیں مجھے، جو روضہ ِٕ سرکار پر
کیں زبانِ اشک سے میں نے کبھی سرگوشیاں

مل گئی بے تاب دل کو دائمی آسودگی
سرورِ کونین سے کیں جس گھڑی سرگوشیاں

سب کہی بھی ان کہی بھی سنتے ہیں وہ اے منیر
دور سے وہ کی ہوں یا ہوں پاس کی سرگوشیاں