اوسلو(عقیل قادر) ایئر بالٹک کے پورے عملے کو نارویجن حکام نے شراب نوشی کے الزام میں گرفتار کر لیا، ایئر بالٹک کی فلائٹ بوئنگ 737 اوسلو سے روانہ ہونے تھی لیکن نارویجن حکا م نے ایک اطلاع ملنے پر شراب کا ٹیسٹ لینے کے بعد چاروں افراد کو گرفتار کر لیا جبکہ انہیں پیر کے دن عدالت میں پیش کیا جائے گا۔عملے کے جن افراد کو گرفتار کیا گیا ہے ان میں ایک پائلٹ، ایک سیکنڈ آفیسر اور دو ایئر ہوسٹس شامل ہیں
ائیر بالٹک کی انتظامیہ نے چاروں افراد کو فوری طور پر نوکریوں سے برطرف کر دیا ہے اور تمام افراد کے خلاف قانونی چارہ جوئی کرنے کا اعلان کیا ہے۔ ایئر بالٹک کے ترجمان کا کہنا ہے کہ ہم شراب نوشی کے متعلق اپنی پالیسی پر سختی سے عملدرآمد کرواتے ہیں اور عملے کی ذرا سی غفلت بھی برداشت نہیں کی جاتی اور ہم اپنے مسافروں کے تحفظ پر کسی بھی صورت سمجھوتہ نہیں کر سکتے۔ ایئر بالٹک کی فلائٹ سے ایک سو نو افراد نے اوسلو سے سفر کرنا تھا ، تمام مسافروں کو پانچ گھنٹے سے زائد انتظار کے بعد نئے عملے کے ساتھ فلائٹ کو اوسلو ائیر پورٹ سے روانہ کیا گیا۔
