بھلائی کا تو زمانہ ہی نہیں

آجکل ہمارے گھر میں میری کزن رہنے کے لیے آئی ہوئی ہیں ، یہ میری وہ کزن ہیں جس سے بھیا شادی نہ ہونے کی صورت میں زمانے کو آگ لگا دوں گا کی دھمکیاں دیتے ہوتے تھے ۔
پہلے دن ڈائنگ ٹیبل پر کھانے کے دوران میں نے بھابھی اور میری کزن کے درمیان تناؤ سا محسوس کیا ، جس کو میری کزن نے بھیا کو بھائی پکار کر ختم کیا ۔
میری کزن کا بھیا کو بھائی کہنا تھا کہ بھیا کے مونہہ پر ڈھائی بج گئے ، جبکہ میرے اور بھابھی کے لبوں پر مسکراہٹ سی بکھر گئی ۔
کھانا کھانے کے دوران میں خیالوں کے گھوڑے دوڑا رہا تھا کہ اچانک ایک آئیڈیا آیا کہ تھوڑی سا شغل لگایا جائے ۔
بھیا کھانا کھا کر لان میں واک کے لیے نکل کھڑے ہوئے ، میں بھی ان کے پیچھے چل پڑا ، بھیا سگریٹ سلگا کر چھوٹے چھوٹے قدم اُٹھا کر ٹہلنے لگے ۔
میں نے لبوں پر شریر سی مسکراہٹ سجائے بھیا کو طنزیہ چوٹ کی ، بھیا مبارک ہو کل تک جو آپکی جانو مانو تھی آج “بھائی” بنا گئی ۔
بھیا نے غصے سے میری طرف دیکھا اور سگریٹ کا کش لیکر گویا ہوئے : “منحوس شرم آنی چاہیے تجھے ایسی بات کرتے ہوئے ” ۔
میں نے ادھر اُدھر کی باتیں کرکے بھیا کو مزید چڑاتا رہا ، اب اس سے پہلے کہ بھیا سے چماٹ پڑتی میں نے نکلنے میں عافیت جانی اور اپنی کزن کے روم میں چلا گیا ۔
کزن سے گپ شپ کرتا رہا ، ان سے ضد کرتا رہا کہ آپی پلیز آپ کل گولہ کباب اور تکہ بریانی اپنے ہاتھوں سے بنا کر کھلائیں ۔
آپ جیسی بریانی اور کباب ہند و سندھ میں کوئی مائی کی لالی نہیں بنا سکتی ۔
آج کھانے کے لیے ڈائنگ ٹیبل پر بیٹھے تو میں نے بھیا کو میسج کیا کہ بھیا پلیز آج کھانے کی تعریف ضرور کیجیے گا ، بھابھی نے اتنی گرمی میں اتنی محنت سے یہ سب کچھ آپ کے لیے بنایا ہے ۔
کم از کم تعریف کرکے انکی دلجوئی تو کیا کریں ، بھیا نے میسج پڑھ کر میری طرف دیکھا اور مسکرا دئیے ۔
کھانا لگا سب لطف لیکر کھانا کھانے لگے ، بھیا کی بھابھی کے لیے محبت نے جوش مارا ، بھیا نے کباب کو مونہہ میں ٹھونسا اور گویا ہوئے :
“آج کا کھانا بہت لذیذ بنا ہے ، بیگم تمہارے ہاتھ سلامت رہیں آج بہت عرصے بعد اتنا لذیذ کھانا کھا کر مزہ آ گیا ” ۔
بس بھابھی جو مسکرا کر بھیا کو دیکھ رہی تھیں ، ایک دو لقمے لیکر اُٹھ کر کمرے میں چلی گئی ۔
بھیا جب روم میں گئے تو پتہ نہیں کیوں چیخنے چلانے کی آوازیں آنے لگی ۔
میں گھر سے باہر ٹہلنے کے لیے نکل گیا ، پھر پتہ نہیں کیوں مجھے بھیا اور بھابھی کی کالز اور میسجز آنے لگے ۔
” منحوس تو گھر گھس آج تیری خیر نہیں ہے نوٹ میں گھر سے ابھی تک مفرور ہوں اورڈیرے پے آ کے بھینسوں کو چارا ڈال رہا ہوں بھلائی کا تو زمانہ ہی نہیں